За време на работната посета на Франција, министерката за одбрана, Славјанка Петровска, го посети и Институтот за високи студии за национална одбрана на Франција, каде што имаше официјална средба со директорот на Институтот, генерал-потполковник Беноа Дуре.
За време на средбата се реафирмира значајноста на склучувањето на договорот за соработка во одбраната, со што ќе се создадат многубројни можности за обука и едукација на нашите припадници на високите престижни школи во Франција.
Воедно, се дискутира и одбранбено-безбедносната проблематика во регионот, при што министерката Петровска ја потенцира значајноста за интензивна интеграција на Западен Балкан во ЕУ. Петровска се заблагодари за поддршката и можноста нашите претставници да се едуцираат на Институтот за високи студии за национална одбрана.
Институтот за високи студии за национална одбрана на Франција има цел да ја промовира културата на одбраната, да учествува во зајакнувањето на националната кохезија и придонес во развојот на стратешкото размислување за прашањата од одбраната и безбедноста. Во два наврата наши претставници учествуваа на курсот „Вооружување и одбранбена економија“ на Институтот за високи студии за национална одбрана.
