Советничката на ЗНАМ во Советот на Општина Прилеп, Мирјана Стеваноска, јавно соопшти дека го напушта владејачкото мнозинство предводено од ВМРО-ДПМНЕ и дека во иднина ќе настапува како независна советничка.
Одлуката ја објави од советничката говорница, нагласувајќи дека во работата на Советот сè помалку има суштинска дебата, а сè повеќе формално потврдување на однапред договорени политички интереси.
Стеваноска истакна дека одлуката ја донела самостојно и без притисоци или влијанија од други политички структури.
„Советникот не треба да биде декор во политички театар, туку активен, принципиелен и гласен претставник на граѓаните“, посочи таа во своето обраќање.
Според неа, во последниот период личните и теснопартиските интереси сè почесто се ставаат пред интересите на Прилеп и прилепчани, поради што не сака повеќе да биде дел од таков начин на функционирање.
Таа најави дека нема да поднесе оставка од советничката функција и дека ќе продолжи да делува како независна советничка во локалниот совет.
Советот на Општина Прилеп брои вкупно 27 советници. Коалицијата предводена од ВМРО-ДПМНЕ има 17 советници, коалицијата предводена од СДСМ шест, Левица три, додека ЗНАМ досега имаше еден советник.
