Украинскиот претседател Володимир Зеленски синоќа изјави дека вооружените сили на земјата добиле соодветни наредби, по изјавата на американскиот претседател Доналд Трамп дека е постигнато примирје во врска со нападите врз енергетските постројки.
„Денес се појави изјава од претседателот на Соединетите Американски Држави дека е постигнат прекин на огнот во енергетскиот сектор. Ова е добра вест за сите, важно е ова да стане дел од реалноста“, рече Зеленски во вечерното обраќање, пренесува Укринформ.
Тој нагласи дека Украина ги поддржува сите реални и сигурни формати за прекин на огнот и војна и дека е подготвена да ги запре нападите врз руските енергетски ресурси, но дека смета на слична подготвеност од Русија и на согласноста на американскиот претседател по ова прашање.
„Го поздравуваме таквиот договор“, нагласи Зеленски.
Тој додаде дека Украина предложила многу чекори за деескалација на конфликтот, но дека рускиот претседател Владимир Путин одговорил на сите со едно „не“.
Тој нагласи дека Украина сака мир, но дека останува прашањето дали Русија сака мир.
„Вооружените сили на Украина ги примија сите релевантни наредби. Ние ја браниме Украина. Се бориме да ја поддржиме Украина. Ги поддржуваме сите чекори што ги преземаат партнерите кои можат да ни помогнат. Очекуваме јасни детали за дијалогот на Америка со Русија и Путин да го исполни она што го кажа претседателот Трамп“, рече Зеленски.
Трамп претходно вчера изјави дека енергетскиот прекин на огнот во војната меѓу Русија и Украина ќе стапи на сила во текот на денот и ги повика страните да не го прекршуваат.
