Група граѓани денеска ја блокираа познатата улица Пластичарска, во близина на булеварот „Никола Карев“, поради исклучување на електричната енергија од страна на ЕВН. Како што информираат извори на 24 Инфо од терен, станува збор за жители од населбата Серава кои спонтано излегле на протест.
Според достапните информации, на собирот се присутни околу 50 до 60 граѓани. Поради блокадата, сообраќајот на булеварот „Никола Карев“ е целосно пренасочен во двата правци, што предизвика застои и отежнато движење во овој дел од градот.
На терен се присутни надлежните служби кои ја следат состојбата и се грижат за безбедноста, како и за регулирање на сообраќајот. Граѓаните својот револт го изразуваат поради, како што велат, ненадејното исклучување на електричната енергија, што им создало сериозни проблеми во секојдневното функционирање.
Засега нема информации за инциденти, а се очекува надлежните институции и ЕВН да излезат со официјален став и појаснување во врска со настанот.
