Утрински Весник
Економија

Нова граѓанска обврзница со камата од 4,6 проценти, минималниот влог е 10.000 денари

Pari 5 Scaled 1.jpg

Министерството за финансии објави проспект за четвртата емисија граѓански обврзници, со годишна каматна стапка од 4,6 проценти и минимален износ за вложување од 10.000 денари.

Аукцијата е закажана за 3 декември, од 9 до 13 часот, а државата планира преку оваа емисија да прибере 100 милиони денари, односно околу 1,6 милиони евра. Обврзниците се денарски, без девизна клаузула.


Заинтересираните граѓани можат да поднесуваат барања преку овластените банки до 1 декември. Банките посредуваат во учеството на аукцијата, а граѓаните треба да ги проверат нивните рокови и услови за уплата. ТТК Банка, на пример, наведува дека барањето и средствата треба да се достават заклучно со 1 декември.

Каматата се исплаќа еднаш годишно. При вложување од 10.000 денари, годишната купонска камата изнесува 460 денари, а за вложени 100.000 денари — 4.600 денари. Овие пресметки се однесуваат на номиналната камата, пред евентуални трошоци. Главницата се враќа при достасувањето на обврзницата.

Со купувањето граѓанска обврзница, граѓаните ѝ позајмуваат пари на државата, која презема обврска да ја исплати предвидената камата и да го врати вложениот износ согласно условите на емисијата.

Можете да прочитате

Европската Унија гледа стратешки потенцијал во минералните ресурси на земјите кандидатки, но повикува на развој на целосни синџири на вредност

Божиновска на P-TEC: По три децении зависност од еден извор на гас, се отвораат нови енергетски правци и регионални поврзувања

Четири милиони патници на повидок, туризмот добива нова развојна можност