Утрински Весник
Економија

Четири милиони патници на повидок, туризмот добива нова развојна можност

Turisstiskopje.jpeg

Македонските аеродроми се на чекор до достигнување на четири милиони патници годишно, што би претставувало значаен резултат за развојот на воздушниот сообраќај и туристичкиот сектор. Позитивниот тренд продолжува и по завршувањето на летната сезона, а досегашните бројки укажуваат на зголемен интерес за патување кон и од Македонија.

Од почетокот на годината до 25 октомври, аеродромите во Скопје и Охрид опслужиле 3.651.073 патници, што е раст од 28 проценти во однос на истиот период минатата година. Во истиот период се реализирани 24.232 летови, односно 10 проценти повеќе.


Вицепремиерот и министер за транспорт Александар Николоски очекува до крајот на годината бројот на патници да се приближи до четири милиони, па дури и да ја надмине оваа бројка. Како значајни фактори за растот ги посочува субвенционирањето на авиолиниите и инвестициите во аеродромската инфраструктура.

Позитивните резултати се надополнуваат со статистиката за туризмот. Заклучно со септември, Македонија има повеќе од 1.100.000 туристи и речиси три милиони ноќевања. Во третиот квартал се регистрирани 35.000 туристи и 110.000 ноќевања повеќе во споредба со истиот период лани, што претставува раст од над шест проценти.

Важен дел од стратегијата за подобра поврзаност е воведувањето на 28 нови директни авиолинии од скопскиот и охридскиот аеродром. Меѓу новите дестинации се Париз, Барселона, Лион, Амстердам, Мадрид, Стокхолм, Прага, Истанбул, Милано, Братислава и Виена. Со проширувањето на авиомрежата се создаваат подобри услови за пристигнување странски туристи и за поголема промоција на Македонија како туристичка дестинација.

Можете да прочитате

Митрески: 51 милион евра не се префрлени во вториот пензиски столб  – во ризик пензиските заштеди на граѓаните

Костадиновска Стојчевска: Со новиот буџет власта ги крати парите за култура и ги гази правата на културните работници

Ковачевски: Намалени инвестиции во болници, училишта и земјоделство, новиот буџет не носи подобар животен стандард