Марихуната останува на листата на забранети супстанции на Светската антидопинг агенција (ВАДА), која денеска ги отфрли барањата да се менува статусот на рекреативната дрога.
До ВАДА имаше официјално барање за разгледување на статусот на ТХЦ, психоактивната состојка на канабисот, по случајот на американската спринтерка Шакари Ричардсон, која лани ја пропушти Олимпијадата во Токио и отслужи едномесечна суспензија откако беше позитивна на марихуана на американскиот шампионат, каде што победи на 100 метри. Ричардсон се правдаше дека пушела марихуана по смртта на нејзината мајка.
„ВАДА е свесна дека барањата за отстранување на ТХЦ од листата на забранети сусптанции не е поддржана од експертите, а во исто време, законите во повеќето земји, како и глобалните закони, покажуваат дека канабисот мора да остане на оваа листа“, се вели во одлуката на ВАДА на состанокот во Сиднеј, Австралија.
Во друга одлука, ВАДА реши да го постави опијатот трамадол на листата на забранети супстанции од јануари 2024 година. Трамадолот е забранет во велосипедизмот од 2019 година, а оваа година на Тур де Франс, колумбискиот велосипедист Наиро Квинтана го загуби шестото место поради позитивен тест.
