На бензинските станици вечерва е забележана зголемена фреквенција на возила, откако Регулаторната комисија за енергетика ги соопшти новите, значително повисоки цени на бензините и дизелот.
Пред новиот ценовник да почне да се применува, голем број возачи решија да ги наполнат резервоарите по досегашните цени. На повеќе локации поради зголемениот број автомобили се формираа редици, а возачите чекаат за да стигнат до бензинските пумпи.
Причината за ваквата слика е едно од позначителните покачувања на цените на горивата во последниот период. Според одлуката на Регулаторната комисија за енергетика, бензините поскапуваат за 4,50 денари за литар, додека дизел-горивото добива уште поголемо зголемување – за 6,50 денари за литар.
Со новата пресметка, Еуросупер БС-95 ќе се продава по цена од 91,50 денари за литар, додека Еуросупер БС-98 ќе чини 93,50 денари. Новата цена на Еуродизел Д-Е V ќе изнесува 98 денари за литар.
Во просек, малопродажните цени на нафтените деривати се зголемуваат за 4,85 проценти во однос на досегашните.
Од Регулаторната комисија ваквата промена ја поврзуваат со движењата на светските берзи. Во периодот земен предвид при пресметката, референтните цени на бензините на светскиот пазар се зголемиле за 8,983 проценти, а кај дизелот растот изнесувал 10,979 проценти.
Истовремено, курсот на денарот во однос на американскиот долар се намалил за 0,2247 проценти.
Во новата пресметка се земени предвид и намалените акцизи – за два денари кај бензините и за четири денари кај дизелот.
Токму најавеното значително поскапување предизвика дел од граѓаните уште вечерва да се упатат кон бензинските станици и да наполнат гориво пред примената на новите цени.
