Државниот јавен обвинител Љупчо Коцевски денеска на прес конференција со минитсерот за внатрешни работи информираше за деталите во врска со проширената истрага за пожарот во дискотеката Пулс во Кочани.
Како што вели, истрагата е проширена за нови 19 лица.
„Сите како и претходните, за кои беше поведена истрага, се осомничени за тешки дела против општата сигурност од член 292 во врска со член 288 од КЗ. За четворица од обвинетите е предложена мерка притвор, за 7 осомничени мерка куќен притвор во комбинација со забрана за остварување на комуникација, и за уште седум лица се предложени мерки за претпазливост. Еден од осомничените во моментот на отворање на истрагата беше надвор од државата“, вели Коцевски.
Коцевски истакна дека меѓу новите осомничени се три лица кои во одреден момент ја извршувале функцијата министер за економија, двајца државни секретари и три службени лица надлежни за сектор за угостителство и туризам кои работеле во Министерството за економија.
„Овозможиле „Пулс“ да добие лиценци и незаконски да продолжи да врши угостителска дејност за целиот период од отворањето до пожарот. Актуелниот министер за економија не е опфатен оти сопственикот не иницирал постапка за лиценца“, додаде Коцевски.
