Првите посериозни снежни врнежи ја открија подготвеноста на надлежните служби за справување со зимските услови, а граѓаните се револтирани поради неисчистените патишта низ целата земја. Најкритични се состојбите на патните правци Стража, Ѓавато и Пресека, каде што снегот предизвика целосни блокади.
Возачите известуваат за километарски колони, застој, и отсуство на механизација од страна на „Македонија пат“. Многумина од нив се заглавени со часови, изложени на зимските услови без никаква информација за тоа кога ситуацијата ќе се нормализира.
„Ова е недозволиво. Секој пат е исто – снегот ги изненадува службите, а ние, граѓаните, плаќаме за нивната неспособност,“ коментира еден од заглавените возачи.
Од „Македонија пат“ нема официјален одговор за тоа зошто механизацијата не интервенира навремено, а граѓаните веќе бараат одговорност од надлежните институции.
Додека снежната магија го разубавува пејзажот, ситуацијата на патиштата потсетува дека зимата во Македонија не простува, особено кога системот не функционира.
