Три случаи во кои мажи пријавиле дека биле физички нападнати од своите сопруги се евидентирани во полициските билтени за Берово, Скопје и Велес.
Според информациите од МВР, вчера во 08:30 часот во ОВР Берово, 45-годишен маж од беровско пријавил дека на 6 септември, околу 19 часот, по претходна расправија во семејниот дом, тој и неговиот малолетен син биле физички нападнати од неговата 34-годишна сопруга.
Од полицијата информираат дека по целосно документирање на случајот ќе следува соодветен поднесок.
Неколку часа подоцна, во 11:30 часот во СВР Скопје, 44-годишен маж пријавил дека на 6 септември во својот дом на подрачјето на Центар бил физички нападнат од неговата сопруга А.Б. (37).
Полицијата презема мерки за целосно расчистување на овој случај.
Сличен настан бил пријавен и во Велес, каде полициски службеници ги лишиле од слобода К.Т. (54) и Д.С. (51), двајцата од Велес.
Претходно, 56-годишен велешанец пријавил дека во домот бил физички нападнат од неговата сопруга К.Т. Тој дополнително пријавил дека на 2 септември телефонски му се заканувал Д.С., сопруг на неговата вонбрачна партнерка.
За настаните биле известени јавен обвинител и Центарот за социјални работи Велес. По целосно расчистување и документирање на случаите ќе бидат поднесени соодветни поднесоци.
