Претседателот на Србија, Александар Вучиќ, оцени дека годинашната Генерална дебата се одвива во услови на нарушен светски мир од размери што не се забележани од Втората светска војна и од основањето на Обединетите нации.
Неправдата направена каде било е закана за правдата насекаде и тие зборови се потсетување и опомена за сите, рече Вучиќ и нагласи дека без оглед на последиците од грубото кршење на основните одредби на меѓународното јавно право, Белград не се откажува од фундаментален принцип на неповредливост на границите.
Ние постојано се залагаме за почитување на принципите на територијален интегритет и суверенитет, рече Вучиќ и посочи дека Србија го почитува интегритетот на Украина.
Претседателот на Србија рече дека не слушнал рационален одговор од ниту еден соговорник на прашањето која е разликата меѓу суверенитетот и територијалниот интегритет на Украина и суверенитетот и територијалниот интегритет на Србија, кој е грубо нарушен.
„Од многу говорници слушнавме приказни за агресија и нарушување на територијалниот интегритет на Украина, многумина велат дека тоа е прв конфликт на европско тло по Втората светска војна. Но, упорно се премолчува вистината дека за прв пат е нарушен интегритетот на една држава во Европа, поточно Србија, која не нападна ниту една друга суверена земја. Бараме јасен одговор на прашањето што со години им го поставувам на моите соговорници, лидерите на многу земји – која е разликата меѓу суверенитетот и територијалниот интегритет на Украина и суверенитетот и територијалниот интегритет на Србија, што е грубо прекршен и на кој многумина од вас му давате меѓународно признание и легитимитет?“, истакна Вучиќ.
Тој потсети дека Србија не стапнала на туѓа територија, ниту го загрозувала територијалниот интегритет на која било суверена држава, за некој да интервенира или да изврши агресија врз неа, како што беше направено во 1999 година.
Вучиќ нагласи дека Белград ќе ги продолжи разговорите со Приштина под покровителство на Европската унија, „бидејќи подобро е да се преговара 100 години отколку да се води војна еден ден“.
– Се надевам дека ќе дојдеме до заемно прифатливо решение, засновано на компромис, бидејќи тоа е единствениот начин да се воспостави постојан мир и просперитет и за Србите и Албанците, како и за целиот регион – рече српскиот претседател на седницата на Генералното собрание на Обединетите нации.
