Директорот на Центарот за управување со кризи (ЦУК), Стојанче Ангелов, денеска повторно апелираше до ЈП Водовод и канализација на Град Скопје за итна интервенција поради отворена шахта спроти ТЦ „Скопјанка“, која сериозно ја загрозува безбедноста на граѓаните.
Проблемот првично беше пријавен од граѓани преку социјалните мрежи до ЦУК уште минатата седмица. Освен шахтата кај „Скопјанка“, алармирано е и за друга отворена шахта веднаш по подземниот премин на бул. „Кузман Јосифовски – Питу“, во близина на зграда број 28.
Од ЦУК информираат дека по добиените пријави веднаш биле известени надлежните од Водовод, од каде добиле одговор дека спорните шахти се во сопственост на станари и деловни субјекти во околните згради.
„Бидејќи местото е доста фреквентно, а во вечерните часови видливоста е намалена, потребно е итно санирање за да се избегнат несакани последици,“ предупредува Ангелов.
Граѓаните се повикуваат на зголемено внимание при движење низ овој дел на Скопје, сè додека проблемот не биде целосно решен.
