Молкот на Јавното обвинителство за скандалот околу надзорот на коридорите 8 и 10Д укажува дека е соучесник на власта во криминалните зделки, обвини ВМРО-ДПМНЕ.
„ Јавноста е сведок како криминалните зделки на Владата на Ковачевски поминуваат неказнето од страна на правосудните органи. Скандалот околу миленикот на власта „Електра Солушн“ секој ден добива нови размери, а ЈО упорно молчи и не презема ништо.
„Електра Солушн“ од фирма за гаќи стана главен столб на власта за испумпување на народни пари. Од 22 милионскиот тендер ќе земе 8,3 милиони евра за водење на надзор. Владата на Ковачевски на јавноста тврдеше дека надзорот ќе го вршат странски експерти, а домашните се само локална помош, и се испостави дека главен играч околу кој се врти целиот тендер е фирма која произведувала гаќи.
А, за лиценцата за надзор, миленикот на власта т.е. „Електра Солушн“, поднесува 12 дена по распишување на повикот за доставување на понудите, а ја добива пет дена потоа.
Откако „Електра Солушн“ добива лиценца за надзор, добива и грант од ФИТР во вредност од 65.000 евра за проект „Дигитално решение за управување со градежни проекти“. Нема крај на криминалот на оваа Влада“ соопшти партијата.
Оттаму бараат одговорност за овој, како што велат, скандал од епски размери.
„Но не само одговорност за функционерите кои го дозволиле ова, туку и правосудните органи кои свесно молчеле и го заштитувале тоа“ порачаа од опозициската партија.
