Во меѓународна акција предводена од припадници на Министерството за внатрешни работи на Република Србија, во соработка со српското Јавно обвинителство за организиран криминал и БИА, а во координација со Европол и неколку европски полициски сили, запленети се 2,7 тони кокаин од едрилица во Атлантскиот Океан, додека во Србија заедно со уште тројца осомничени е уапсен организаторот на оваа организирана криминална група С.К. (1953).
Покрај С.К., во Србија се уапсени и членови на оваа организирана криминална група Н.С. (1988), Н.С. (1980) и Б.К. (1983).
Криминалистичката полиција на Полициската управа за град Белград во јануари 2022 година покрена истрага против оваа организирана криминална група поради сомнение дека се занимавала со шверц на големо со кокаин од Јужна Америка во ЕУ, а активностите против оваа мрежа се проширени на другите светски полициски сили и има координирана истрага предводена од Европол, во рамките на оперативната работна група „Балкански картел“.
Надлежните органи на Шпанија, Бразил, Хрватска, Франција, Полска, Португалија и Словенија со координација на Европол учествуваа во операцијата која ја водеше Србија.
На 24 август годинава, врз основа на заедничко оперативно работење, уапсени се шест лица, од кои четири на територијата на Србија, претресени се 15 станови, најдени се 2,7 тони кокаин, две возила од висока класа, скапи рачни часовници и над 550.000 евра се запленети. Исто така, во рамки на финансиската истрага, блокирани се и поголем број банкарски сметки и имоти.
Се сомнева дека оваа организирана криминална група превезувала кокаин од Јужна Америка, обезбедувала едрилици и праќала пратки користејќи шифрирана комуникациска платформа.
