Тајван денеска го лансираше својот прв телевизиски канал за вести, начин на живот и забава на англиски јазик.
Телевизискиот канал Тајван Плус, поддржан од владата, започна минатата година како претежно онлајн платформа за стриминг и има силна поддршка од претседателката Цаи Инг-вен, објави „Ројтерс“. Таа на церемонијата на лансирање рече дека ТВ каналот веќе го подигнал меѓународниот профил на Тајван и ќе му помогне на островот да воспостави сè поблиски врски со „земјите кои ги споделуваат нивните основни вредности на слободата и демократијата“.
„ Приказните за Тајван треба да се споделат со светот. Имајќи предвид дека се повеќе луѓе ширум светот се заинтересирани за Тајван, поважно е од кога било да имаме платформа да го донесеме Тајван на меѓународната заедница“ рече Цаи.
Министерот за култура Ли Јунг-те им рече на новинарите дека Тајван треба да може да се справи со она што Кина го вели за островот и да ја истакне позицијата на Тајван.
„ Нашиот глас не се слушна целосно на меѓународно ниво. Кина постојано го промовира ставот дека Тајван е дел од Кина и многу луѓе веруваат во тоа. Им велите дека не е така, а тие прашуваат зошто“ изјави Ли.
Тој додаде дека во иднина ќе ги користат тајванските медиуми за да и објаснат на меѓународната заедница зошто тоа не е така.
Телевизискиот канал во моментов е достапен само во Тајван, но Ли рече дека планираат да започнат со емитување и во САД во следните шест месеци. Тајван веќе има неколку локални медиуми на англиски јазик, од кои најистакнат е Тајпеј Тајмс, основан во 1999 година.