Вработените во загрепскиот јавен превоз и во дел од градските комунални служби денеска започнаа штрајк по неуспешните преговори за нов колективен договор. Синдикатите најавија дека прекинот на работата ќе почне во 3:30 часот и дека може да трае повеќе денови доколку не се постигне договор.
Штрајкот ги опфаќа Загрепскиот електричен трамвај (ЗЕТ) и подружници на „Загрепски холдинг“, меѓу кои и службата за собирање отпад. ЗЕТ ги предупреди граѓаните да планираат значително повеќе време за патување. Градската и приградската железница, според претпријатието, сообраќа по редовниот возен ред.
Од „Загрепски холдинг“ ги повикаа жителите да го одложат поголемото расчистување на домовите и изнесувањето габаритен отпад, како и посетите на рециклажните дворови, кои веројатно ќе бидат затворени.
Синдикатите бараат повисоки плати и подобри услови во новиот колективен договор. Според нив, мнозинството членови ја поддржале одлуката за штрајк.
