Рано утринава Русија изврши трииполчасовен напад со беспилотни летала врз јужните делови на областа Одеса, погодувајќи ја пристанишната инфраструктура на реката Дунав, објавија украинските воздухопловни сили на комуникациската платформа Телеграм.
Украинските системи за противвоздушна одбрана соборија 22 од 25-те ирански дронови „Шахед“ кои Русија ги користеше за напад на Одеса во раните утрински часови во неделата, напишаа воздухопловните сили на Телеграм.
Украинската јужна воена команда на социјалните мрежи објави дека најмалку двајца цивили се повредени во нападот на, како што ја нарекоа, „цивилната инфраструктура на Дунав“. Дунав стана главна рута за извоз на жито на Украина, откако во јули пропадна договорот спонзориран од Обединетите нации, кој му дозволи на Киев да го транспортира своето жито преку Црното Море.
