Утрински Весник
Свет

Извештај на СЗО за Европа: Речиси секое шесто дете е жртва на сајбер насилство

Szo.jpg

Околу 16 отсто од децата на возраст од 11 до 15 години биле жртви на сајбер-насилство во 2022 година, што е четири отсто повеќе отколку во 2018 година, според извештајот на Светската здравствена организација (СЗО) за Европа, кој опфаќа 44 земји.

-Извештајот е повик за будење за сите нас да се справиме со малтретирањето и насилството, кога и каде и да се случи тоа, изјави регионалниот директор на СЗО за Европа Ханс Клуге.

Според студијата „Здравствено однесување на деца на училишна возраст“, ​​15 отсто од момчињата и 16 отсто од девојчињата изјавиле дека барем еднаш биле цел на сајбер-насилство во последните неколку месеци, пренесува Радио Слободна Европа.

Агенцијата на ОН истакна дека пандемијата го променила начинот на кој адолесцентите се однесуваат едни со други.

-Виртуелните форми на врсничко насилство станаа особено релевантни од почетокот на пандемијата со Ковид-19, кога светот на младите стана сè повеќе виртуелен за време на заклучувањето, се вели во извештајот.

Другите форми на малтретирање забележаа благ пораст.

Единаесет проценти од момчињата и девојчињата рекле дека биле малтретирани на училиште најмалку два или три пати месечно во изминатите неколку месеци, во споредба со десет проценти пред четири години.

Највисоко ниво на сајбер-малтретирање доживеале момчињата во Бугарија, Литванија, Молдавија и Полска, додека најниско ниво е забележано во Шпанија, објави СЗО без детални податоци.

„Бидејќи младите поминуваат до шест часа онлајн секој ден, дури и малите промени во стапката на малтретирање и насилство може да имаат длабоки импликации за здравјето и благосостојбата на илјадници луѓе“, рече Клуге.

Еден од осум адолесценти признал дека малтретирал други преку Интернет, што е зголемување за три процентни поени во споредба со 2018 година, според извештајот.

Во меѓувреме, бројот на адолесценти кои се впуштиле во физички пресметки остана стабилен во четиригодишниот период и изнесува десет отсто – 14 отсто кај момчињата и шест отсто кај девојчињата.

Студијата се базира на податоци од 279 илјади деца и адолесценти од 44 земји низ Европа, Централна Азија и Канада.

Во повеќето земји, сајбер-малтретирањето достигнува врв кога децата имаат 11 години за момчиња и 13 за девојчиња.

Можете да прочитате

Њујорк тајмс: Нетанјаху го откажа одмаздничкиот напад врз Иран по телефонскиот разговор со Бајден

Околу 20.000 свињи загинаа во пожар на фарма во Германија

Вонреден состанок на министрите за надворешни работи на ЕУ во вторник поради нападот на Иран врз Израел