Утрински Весник
Македонија

Андонова: Жртвата не смее да остане сама по полициската интервенција

Img 8393.jpeg

Полицајците што интервенираат по пријава за насилство во домот би можеле, врз основа на проценка на ризикот, да одлучат за отстранување на насилникот од домот. Таква можност се предвидува со предложените законски измени, објасни јавната обвинителка Спасенка Андонова во емисијата „Ноќно студио“ на 4ТВ.

Според Андонова, целта на предложената мерка е жртвите на семејно и родово базирано насилство побрзо да добијат заштита. Таа посочи дека еден од најголемите предизвици е да се спречи жртвата повторно да биде изложена на опасност откако полицијата ќе ја заврши интервенцијата.


„Жртвата во ниту еден момент не смее да биде оставена сама на себе“, нагласи обвинителката.

Андонова рече дека заштитата треба да почне веднаш по пријавата и да продолжи во текот на обвинителската и евентуалната судска постапка. Во зависност од потребите, жртвата треба да добие психолошка и медицинска помош, бесплатна правна помош и можност за сместување во сигурна куќа. Посебно внимание, додаде таа, треба да се посвети на децата што присуствувале на насилството или живеат во истото семејство.

„Селективното постапување никому не носи корист и резултат“, истакна Андонова, предупредувајќи дека пропустот на една институција може да ја загрози заштитата на жртвата.

Таа посочи дека полицијата, центрите за социјални работи и обвинителството треба да го усогласат постапувањето уште од првата пријава. Координацијата, според Андонова, е потребна и за прибирање докази и утврдување одговорност и за спречување ново насилство додека трае постапката.

Можете да прочитате

Андонова: Алкохолот и дрогата се присутни во многу случаи на семејно насилство

Андонова: Има случаи кога децата сами пријавуваат семејно насилство

По пријава за насилство, полицијата треба во рок од 12 часа да го извести обвинителот вели Андонова