Полициски службеници од СВР Тетово запленија околу 116 грама хашиш при претрес во гостиварското село Здуње, а едно лице е лишено од слобода.
Како што информира Министерството за внатрешни работи, акцијата била спроведена на 4 јули од страна на полициски службеници од Одделението за недозволена трговија со дрога и оружје при СВР Тетово и Надворешната канцеларија за криминалистички работи Гостивар, по претходно добиени оперативни сознанија и по наредба издадена од Основниот суд во Гостивар.
При претресот во објект во сопственост на С.Б. (63) од село Здуње, во дворот била пронајдена кеса со околу 116 грама хашиш.
По откривањето на дрогата, С.Б. бил лишен од слобода и задржан во полициска станица.
Од МВР информираат дека по целосното документирање на случајот, против него ќе биде поднесена кривична пријава за неовластено производство и пуштање во промет наркотични дроги, психотропни супстанции и прекурсори, казниво по член 215 од Кривичниот законик.
