Во организација на Програмата „ЕУ за општините“, дeнеска во Скопје ќе биде одржан првиот ЕУ-МК Саем за одржлив локален развој и вмрежување. Целта на овој еднодневен настан е да се промовираат добри практики и успешни проекти финансирани од ЕУ, да се поттикнат нови партнерства меѓу општините, како и да се отвори простор за размена на искуства и идеи за понатамошен локален развој.
Настанот официјално ќе го отворат министерот за локална самоуправа, Златко Перински и програмскиот менаџер на Програмата „ЕУ за општините“, ЕУ Делегација во Северна Македонија, Енцо Дамиани. Целиот настан е целосно јавен и отворен за медиумско присуство.
Како што најавија организаторите на настанот ќе бидат претставени резултатите од повеќегодишната соработка меѓу општините од Северна Македонија и нивните партнери од земјите-членки на Европската унија, како и вложувањата кои ги прави Европската Унија преку Програмата „ЕУ за општините“.
Посебен фокус ќе биде ставен и на теми како што се урбаната мобилност и менаџмент на туристички дестинации, како два клучни аспекта на одржливиот развој на локално ниво. Предвидено е претставување на конкретни решенија од општините Велес, Струмица, Кавадарци и други, како и искуства од германските региони Гронау и Енепе-Рур, и грчката општина Едеса. Саемот се очекува да овозможи вмрежување, билатерални средби и интерактивна дискусија меѓу општините и меѓународните партнери.
Настанот ќе биде организиран во форма на саем, со учество на делегации од Северна Македонија, Германија и Грција, министри во Владата, ЕУ Делегацијата во земјава, како и други релевантни чинители.
Овој саем е дел од завршните активности на програмата „ЕУ за општините“ која во изминатите пет години придонесе за конкретни подобрувања на локално ниво во речиси сите 81-на општина низ земјава.
