Украина го ослободи селото Андријивка во областа Доњецк, кое се наоѓа јужно од Бахмут, соопшти денеска Генералштабот на вооружените сили на Украина. Веста за ослободувањето на селото вчера ја соопшти заменик-министерката за одбрана Хана Маљар, но украинската војска набрзо ја демантираше оваа информација.
Третата ударна бригада вчера соопшти дека борбите во Клишчивка и Андријивка продолжуваат, по што Маљар ја коригира својата претходна изјава.
„Беше тешко и вчерашната ситуација неколку пати се менуваше многу динамично“, ги објасни контрадикторните извештаи Маљар.
Генералштабот додаде дека украинските сили им нанеле големи загуби на руските војници како дел од офанзивните операции околу блиското село Клишчивка, во кои тие исто така постигнале делумен успех. Андријивка е мала населба која се наоѓа на околу три километри јужно од Клишчивка и помалку од 10 километри јужно од окупираниот Бахмут.
