Лацио стигна до 1:0 победа над Рома, вторпат оваа сезона во „Дерби дела капитале“, за да се искачат на второто место на табелата (барем до вечерашното дерби Интер-Јувентус).
Трагичар на мечот беше Бразилецот Роџер Ибањез, кој го продолжи својот ужасен скор против Лацио, добивајќи црвен картон во првото полувреме. Ибањез прво рано доби жолт картон, за во 32. минута да добие и црвен картон за да го остави својот клуб на „цедило“. Ова беше нова „глупост“ на Ибањез против Лацио, откако неговата катастрофална грешка донесе гол во првото градско дерби оваа сезона, а во јануари 2021 година буквално подари два гола.
Теренската предност дојде во прв план во 65. минута, кога Матија Ѕакањи по одличната асистенција од Фелипе Андерсон, го совлада Руи Патрисио за водство и за голема победа.
