„Го крчмите мојот имот, без око да ви трепне“, реагира Трифун Костовски, поранешниот мнозински сопственик на Еуростандард банка.
Предупредувам, вели Костовски, дека мојата војна против организаторите на овој криминоген чин ќе оди до крај.
„Зградата на бившата Еуростандард банка по ниту еден параметар не смее да биде подолу од 12 милиони евра“, потенцира Костовски по информацијата дека фирмата „Пантелеон ГС“ на третата по ред и последна аукција понудила 5,37 милиони евра за дирекцијата на бившата Еуростандард банка, со вкупна квадратура од 3.500 м2, со можност на доизградба на нови 800 м2 во самиот епицентар на Скопје.
„Предупредувањето го упатувам до стечајниот управител Саздовски и до одборот на доверители. Немојте да дозволите процедурално да помине криминоген чин во обезвреднување на туѓиот имот за сметка на поединци и групи. Самиот манипулативен чин за евтино купување на мојот имот е ваш потег да го обезвредните собраниот капитал во стечајната маса и со тоа на јавноста да ѝ докажете дека јас и моето семејство сме виновни доколку не се соберат средства за обесштетување на правните, физичките лица и на нас акционерите“, вели Костовски во реакцијата.
Инаку, утрово во соопштение беше истакнато дека македонската компанија „Пантелеон ГС“ победи на наддавањето на третата по ред електронска аукција за овој деловен простор.
„Дали по две години, конечно, ќе се врати деловната атмосфера во веќе поранешната зграда на Еуростандард банка. Многу веројатно е дека од тука млади и талентирани македонци ќе работат за американскиот пазар. Причината за тоа е што македонската компанија „Пантелеон ГС“ победи на наддавањето на третата по ред електронска аукција за овој деловен простор.
На страницата за е-аукции јавно е достапна информацијата дека компанијата „Пантелеон ГС“ со понудени 330 милиони денари е избрана за најдобар понудувач. Сега понудата треба да биде прифатена од собранието на доверители, а од прибраните пари да се обесштетат доверителите на пропадната банка“, е напишано во информацијата.
Зградата на Еуростандард банка, како што се појаснува во напишаното, е една од малкуте вредни имоти што останаа во рамките на стечајната маса, а која веќе две години не се одржува и со текот на времето ќе губи од својата вредност ако некој не се грижи за неа.
Од Здружението на оштетените штедачи на Еуростандард банка, како што е потенцирано во напишаната информација, веќе од претходно порачале дека посакуваат што побргу да се продаде зградата посакувајќи му успешно идно користење и бериќет на најдобриот понудувач и купувач на зградата.
„Пантелеон ГС“, како што е појаснето, е брзорастечка македонска аутсорсинг-компанија, која работи за компании на американскиот пазар. „Компанија со амбициозни планови за раст и развој, која за кратко време сака и да го удвои бројот на вработени, а кој во моментов брои 100-ина талентирани Македонци“, стои во информацијата.
