САД избришале чувствителен софтвер на беспилотното летало MQ-9 пред да се урне во Црното Море за да ја спречат Русија да собира доверливи информации, потврдија двајца американски претставници за Си-Ен-Ен. Чекорите за бришење на софтверот беа преземени по средбата на дронот со два руски борбени авиони Су-27.
Американците тврдат дека руски борбени авиони вчера фрлиле гориво пред американско набљудувачко беспилотно летало, по што еден од руските авиони се судрил со дронот, оштетувајќи го неговиот пропелер и принудувајќи ги Американците да го соборат дронот во Црното Море. Секретарот на рускиот совет за безбедност Николај Патрушев изјави дека Русија ќе се обиде да ги извади остатоците од дронот.
Патрушев претходно беше шеф на руската Федерална служба за безбедност (ФСБ).
„ Не знам дали ќе го најдеме или не, но мора да се обидеме… И секако ќе се обидеме“, рече Патрушев на руската државна телевизија „Русија-1“.
Според официјален претставник на морнарицата, САД немаат бродови на морнарицата во Црното Море, што би го направило секој обид за повлекување на САД исклучително тежок и одзема време.
Вчера, портпаролот на Советот за национална безбедност, Џон Кирби, рече дека САД презеле чекори за заштита на доверливите информации што би можеле да ги добијат оние што ќе го пронајдат дронот.
