Без леб останаа некои од маркетите во Скопје по одлуката на Владата да ја замрзне цената на 33 денари. „Макфакс“ направи обиколка во неколку познати брендови. Рафтовите, каде што до вчера стоеја полубелиот и белиот леб, во најголем дел се празни. Онаму каде што има леб, тој е производство на помали фурни и се продава по усогласени цени. Рафтовите на кои стои лебот чија цена не е замрзната и денеска се полни.
„Макфакс“ беше и во две познати скопски фурни. Во едната рафтовите беа полни со полубел и бел леб, кој се продаваше и под замрзнатата цена, односно за 32 денара. Овде имаше редица за купување. Во друг објект на истата пекарница, каде што на самото место се произведува лебот, рафтовите беа празни онаму каде што треба да стои лебот, кој денес е со замрзната цена.
Многумина од производителите денеска ја реализираа заканата дека нема да произведуваат и да носат леб на пазарот по укинувањето на субвенцијата за струја и по замрзнувањето на цената на лебот од страна на Владата.
Министерот за економија Крешник Бектеши најави дека за производителите што нема да произведуваат леб, ќе има санкции од страна на инспекторатите. Тој ги повика пекарниците што бојкотираат на дијалог.
