Гостивар, 16 јуни 2020 (МИА) – Мерките за заштита од комарци и глодари на територијата на Општина Гостивар ќе се спроведат кон крајот на овој месец. Првиот човек на општината ја потврди информацијата за МИА и нагласи дека постапката е завршена, а потпишан е договор вреден близу 12 илјади евра.
Градоначалникот Арбен Таравари уверува дека активностите ќе се спроведат во период кога тоа е вообичаено како и во изминатите години.
– Комплетно ја спроведуваме таа набавка и очекуваме да се реализра договорот што го потпишавме. Вообичаено овие активности за дератизација и дезинсекција сме ги спроведувале во последната недела од јуни. Уверен сум дека така ќе биде и оваа година, рече Таравари
Договорот со Друштвото за производство, трговија, и услуги „Плант Медика Дооел“ од Куманово е потпишан на 12 мај годинава.
Со него се опфатени услугите за дезинсекција за кои општината треба да плати околу 340 илјади денари и дератизација на канализационите системи и општински објекти и воспоставување на заштни зони околу водоснабдителните системи која е со приближно иста вредност.
Првата дезинсекција за уништување на возрасните комарци и останати штетници е предвидена да започне во петок 19 јуни навечер, после 24:00 часот. Со неа ќе бидат опфатени градскиот парк и бреговите на Вардар од болницата па до Здуњска раскрсница, коритото на Вардар во атарот на село Равен, каналите за наводување кои минуваат низ градските населби: Шеста зона, Малеарди, Фазанерија и селата Бањица, Чајле и село Форино.
За дезинсекцијата ќе се употреби средството Aurodil, кое може да им наштети на пчелите, па затоа пчеларите треба преземат мерки за заштита и да ги заштитат пчелните семејства.згм/дма/
