Струмица, 4 мај 2020 (МИА) – Со заменување на прозорците и вратите се подобрува енергетската ефикасност во зградата каде што се сместени Јавните претпријатија „Струмица Гас“ и „Паркиралишта Струмица“, информираат од струмичката Општина.
– Деновиве почна замената на старите прозорци и врати со нови. На овој начин побрзо и полесно ќе се затопли просторот и значително ќе се намалат загубите на топлина, а со тоа ќе намали и потрошувачката на енергија, се додава во информацијата од локалната самоуправа.
За овој зафат ќе се потрошат еден милион и двесте илјади денари, обезбедени преку грант добиен по јавен повик од Програмата за намалување на аерозагадувањето за 2020 година – енергетска ефикасност, објавен од Генералниот секретаријат на Владата на Република Северна Македонија, а аплициран преку Одделението за заштита на животната средина во Општина Струмица. рт/сп/
