Куманово, 27 јуни 2020 (МИА) – Куманово е убав град, има прекрасни граѓани и заслужува позитивни нешта, ВМРО – ДПМНЕ ќе води позитивна кампања, која ќе се заснова на проекти и обнова, изјави денеска во Куманово, носителот на ИЕ 2 од ВМРО – ДПМНЕ, Владо Мисајловски.
Toj им се заблагодари на граѓаните кои им приоѓаат на кандидатите за пратеници и кои сакаат да ја слушнат понудата на ВМРО – ДПМНЕ која е различна партија од останатите и нуди проекти.
– Додека СДСМ велат дека можат повеќе да работат, јас мислам дека они можат повеќе да крадат, да продолжат со мито и корупција и можат повеќе да не угнетуваат. Затоа ние ќе ја обновиме Македонија и ќе продлжиме со позитивна кампања. Овој град е прекрасен и заслужува убави нешта, позитивни нешта и ние натака оваа кампања ќе ја целиме, изјави Мисајловски.
Носителот на листата во ИЕ 2 вели дека ВМРО – ДПМНЕ ќе обезбеди сигурна иднина за секој граѓанин и му се заблагодари на министерот за внатрешни работи Наќе Чулев, за, како што кажа, санкционирањето на професионални лица од МВР кои се во партиска кампања.
– Овој ден е поубав бидејќи со мене е и министерот Наќе Чулев е тука во Куманово да си направи свои состаноци, но се разбира еве и имаме можност да бидеме заедно. Јас сакам да изразам и голема благодарност за оние работи што ги слушнав од него, дека силно е ангажиран за сите оние луѓе што се професионални лица во МВР, a што се во партиска кампања да ги санкционира. Јавно сакам да се заблагодарам такви луѓе требаат во државата. Луѓе што се професионалци и што сакаат да има фер и демократски избори, ништо повеќе, изјави Мисајловски.
Тој оцени дека е потребна фер, демократска кампања и изрази уверување во победата на ВМРО – ДПМНЕ.
– Во Куманово има прекрасни луѓе, уметници, има луѓе кои ја промовираат Македонија, еден таков е Тони Михјаловски, мој пријател, кој секогаш кога ќе му кажам дека сум во Куманово доаѓа со мене, и тоа е најважно да си го сакаш местото од каде што си, да си горд и да шеташ по улиците достоинствено. Им благодарам на сите граѓани што ни овозможуваат оваа прилика да бидеме пријатели со нив, и кога ќе завршат изборите повторно ќе бидеме тука да продолжиме да имаме едно убаво општество, добри пријатели, додаде Мисајловски. ам/цр/
