Партијата Интегра поднесе тужба против лидерот на ВМРО-ДПМНЕ, Христијан Мицкоски преку која бара 100.000 евра, поради изнесени клевети и лаги за време на прес-конференција. Според Интегра, Мицкоски со неговото излагање му го нарушил угледот, авторитетот и честа на нивниот лидер, Љупчо Ристовски.
„Пораката е дека на јавна политичка сцена, секој, особено лидери на партии да престанат да сеат лаги и клевети и на тој начин да го разоруваат македонското национално ткиво. Длабоко вгнездените удбашки структури во ДП*НЕ веќе 30 години зад завеса ја раководат оваа политичка партија, која забрзано го губи приматот врз македонскиот национален стратегиски интерес. Интегра, со Божја помош, во налет го презема приматот, сигурно и неповратно“, објави партијата.
Доколку ја добијат судската постапка и оштетата од 100.000 евра, парите ќе бидат наменети за поддршка на здруженија за деца со пречки во развојот. Претходно, Ристовски изјави дека тужбата против Мицкоски е бидејќи лидерот на ВМРО-ДПМНЕ за време на прес-конференција кажал: „Имаме сериозни информации и докази дека финансиски мотивирани од други политички партии, а луѓето кои се тука со мене, исто така, тие индиции, ги потврдуваат со сопствено сомневање, дека постојат сериозни финансиски мотиви со цел да направат штета во опозицијата и да се поделат гласовите“.
Претходно, претседателот на Интегра побара Мицкоски да му се извини на него и партијата во рок од 24 часа, во спротивно, ја најави тужбата која денеска ја поднесе.
