Сите граѓани кои во овој продолжен викенд, односно на 10, 11 и 12 октомври ќе купуваат домашни производи и услуги или производи од ИТ индустријата до 30.000 ден, ќе го добијат назад целиот износ на ДДВ, изјави денеска пратеничката на СДСМ, Сања Лукаравска.
„Оваа мерка којашто е дел од четвртиот пакет од антикризни мерки, станува достапна за 350.000 корисници на апликацијата Мој ДДВ, но и за нови корисници кои ќе ја инсталираат апликацијата. На граѓаните кои ќе пазаруваат домашни и производи од ИТ индустријата, меѓу 10-12 октомври, по неколку денови на трансакциските сметки ќе им биде извршен поврат на целиот ДДВ од купените производи“, објасни пратеничката и додаде дека викендот без ДДВ значи пари назад на сметките на граѓаните и зајакнување на домашниот буџет.
Лукаревска исто така нагласи дека за само една година преку мерката Мој ДДВ, веќе се вратени над 11 милиони евра кај граѓаните.
