Со помош на службеното куче за откривање наркотици „Брат“ на грчката крајбрежна служба, на пристаништето Лаврио во близина на Атина, во автомобил биле пронајдени над 18 килограми кокаин во вредност од 1,3 милиони евра, а уапсен е 43-годишен британски државјанин, јави дописничката на МИА од Атина.
Од крајбрежната служба на Грција соопштија дека дрогата била откриена во автомобил со странски регистарски таблички, кој влегол во трговското пристаниште во Лаврио, а претресот бил извршен по добиени информации.
Во автомобилот биле пронајдени 127 пластични пакувања со 18 килограми и 113 грама кокаин, внимателно скриени во шуплините кај багажниот простор и во специјално изработен таен простор под главниот дел на багажникот, а бил откриен од кучето-душкач.
Скриениот простор се отворал со посебно прикриено копче, кое не било дел од оригиналната конструкција на возилото.
Според процената на грчката крајбрежна служба, очекуваната вредност на дрогата на малопродажниот пазар надминува 1,3 милиони евра.
