Екс началникот на Петата управа во УБК и бегалец, Горан Грујевски вчера бил уапсен во Загреб по распишана меѓународна потерница од македонските власти но денеска бил пуштен на слобода. Хравсткото МВР и Интерпол доставило информација до МВР вчера за приведувањето како и последната информација од утрово дека тој е пуштен на слобода поради фактот што му бил одобрен азил во Грција.
Грујевски и неговиот колега Никола Бошковски, ву јуни 2017 година побегнаа од Македонија во Грција откако беа обвинети во судскиот процес „Таргет Тврдина“, поврзан со нелегалното масовно прислушување.
Грујевски беше обвинет и во случајот „Тврдина 2“, за незаконско палење документи на ДСК, доказите за нелегалното прислушување, но и во случајот „Арка“ заедно со Сашо Мијалков и Небојша Стајковиќ за нелегално снабдување со опрема за прислушување од Велика Британија.
Горан Грујевски е во бегство од 26 јули 2017 година кога требаше да оди во притвор, но полицијата не го најде дома. Тој и Бошковски избегаа по донесувањето на решението за притвор од Апелациониот суд . Наместо да ги испрати во Шутка, судот им даде рок од една недела да се жалат до Врховниот суд што тие го искористија за да избегаат од земјава.
Грујевски и Бошковски, беа уапсени на 18 октомври 2017 година на аеродромот во Солун со лажни бугарски пасоши, под имињата Неџби Хасан и Христо Атанасов. Во меѓувреме и двајцата побараа политички азил во Грција.
