Уште еден тежок инцидент со малолетничко насилство се случил во општина Ѓорче Петров.
Малолетник добил тешки телесни повреди откако бил нападнат од група врсници во дворот на основно училиште во скопската општина Ѓорче Петров.
Според информациите од Министерството за внатрешни работи, настанот бил пријавен во СВР Скопје на 16 септември околу 21 часот.
Како што било пријавено во полицијата, на нападот му претходела расправија, по што неколку малолетници физички го нападнале детето. Еден од напаѓачите му бил познат на повредениот малолетник.
По нападот било констатирано дека детето се здобило со тешки телесни повреди и било пренесено во болница.
Од МВР информираат дека се преземаат мерки за целосно расчистување на случајот и за утврдување на сите околности под кои се случил нападот.
