Истражната постапка за трагичниот настан во кој двегодишно дете го загуби животот од залутан куршум за време на новогодишната ноќ сè уште е во тек, изјави министерот за внатрешни работи Панче Тошковски.
Тошковски потврди дека досегашните вештачења утврдиле оти смртта на детето е последица на залутан куршум, а не на директен напад. „Не станува збор за куршум насочен кон детето, туку за залутан куршум. Преземаме сè за да го утврдиме конкретниот сторител, иако ваквите случаи се исклучително тешки за детектирање“, рече министерот.
Во однос на обвинувањата од родителите за полициска бруталност, Тошковски појасни дека полицијата интервенирала по повик од болничкиот персонал во Градската болница во Скопје. „Интервенцијата беше поради агресивно и недолично однесување во болницата. Полициските службеници затекнале поголема група лица, а по утврдување на нарушување на јавниот ред и мир извршија интервенција во рамки на законските овластувања“, рече Тошковски.
Министерот истакна дека во МВР е започната внатрешна истрага за постапувањето на полицијата и дека по завршувањето ќе бидат соопштени сите детали за евентуално пречекорување на овластувањата.
Детето, кое беше тешко повредено од огнено оружје, беше префрлено од Ургентниот центар на Клиниката за неврохирургија, каде медицинскиот тим, и покрај максималните напори, не успеа да го спаси поради тешките повреди на мозокот. Основното јавно обвинителство издаде наредба за обдукција на телото.
