Носителот на пратеничката листа „Студентите победуваат“, професорот Илија Срдановиќ, изјави дека очекува победа на предвремените парламентарни избори во Србија закажани за 25 октомври и дека студентското движење е подготвено ненасилно да го брани секој добиен глас.
Во интервју за агенцијата Бета, Срдановиќ рече дека по евентуалната промена на власта, главни приоритети треба да бидат обновувањето на довербата во институциите, воспоставувањето на владеењето на правото и ослободувањето на медиумите од политичко влијание.
Тој оцени дека 14-годишното владеење на Српската напредна партија и Александар Вучиќ не заслужува „преодна оценка“, додавајќи дека студентската листа сака да се насочи кон проблемите на граѓаните и подобрувањето на условите за живот.
Фокус на здравството и младите лекари
Срдановиќ, кој е лекар и универзитетски професор, посебно се осврна на состојбата во здравствениот систем. Според него, програмата на студентската листа предвидува мерки што треба да им помогнат и на пациентите и на младите лекари кои повеќе не гледаат перспектива за работа во Србија.
Како можни решенија ги наведе департизацијата на здравството, субвенциите за работа во руралните средини, олеснувањата за формирање семејство и помошта при решавање на станбеното прашање.
Тој нагласи дека спроведувањето на овие мерки зависи од создавањето држава во која институциите ќе функционираат независно и ќе постои владеење на правото.
Случајот со несреќата во Нови Сад
Говорејќи за падот на настрешницата на железничката станица во Нови Сад и загинувањето на 16 лица, Срдановиќ изјави дека не очекувал оти и по речиси две години никој да не ја прифати одговорноста.
Тој оцени дека одговорните за трагедијата мора да бидат изведени пред лицето на правдата и дека граѓаните не смеат да се чувствуваат небезбедно додека лицата виновни за системските пропусти остануваат неказнети.
„Контролата на изборите не завршува на избирачкото место“
Срдановиќ рече дека масовната поддршка при собирањето потписи покажала кому граѓаните му веруваат. Тој ги повика поддржувачите на 25 октомври да бидат обединети и да учествуваат во заштитата на изборниот процес.
„Важно е тој ден сите да бидеме како еден и да го зачуваме секој глас што ни е доверен. Знаеме против кого се бориме, но сме подготвени ненасилно да го одбраниме секој глас“, изјави Срѓановиќ.
Во врска со настапот на другите опозициски партии, тој рече дека студентското движење нема да се меша во нивните одлуки, но смета дека овие избори ги надминуваат вообичаените идеолошки поделби.
Најави реформи во институциите и медиумите
Срдановиќ ги обвини јавните сервиси РТС и РТВ дека се под политичка контрола. Тој најави дека студентскиот план предвидува реформа на Регулаторното тело за електронски медиуми, деполитизација на информативниот простор и преиспитување на критериумите за доделување национални фреквенции.
Како приоритети на евентуалната идна влада ги наведе и борбата против корупцијата, донесувањето закон за лустрација, испитувањето на потеклото на имотот, одземањето незаконски стекнато богатство и ревизијата на државните проекти.
Според него, постојните закони треба веднаш да почнат доследно да се применуваат, додека за подлабоките реформи ќе бидат потребни стратегија, време и политичка упорност.
Илија Срдановиќ е професор на Катедрата за ургентна медицина при Медицинскиот факултет во Нови Сад и кардиолог во Институтот за кардиоваскуларни болести на Војводина во Сремска Каменица.
