Шпанската фудбалска репрезентација е нов светски шампион, откако по продолженија ја совлада Аргентина со 1:0 во големото финале на Светското првенство. Херој на „црвената фурија“ беше Феран Торес, кој го постигна единствениот гол во 106. минута и ѝ ја донесе втората светска титула на својата селекција.
Финалниот натпревар започна претпазливо од двете страни. Ниту Шпанија, ниту Аргентина не сакаа да ризикуваат во воведните минути, па повеќе внимание посветуваа на одбраната на сопствениот гол отколку на офанзивата. Во првото полувреме не беа создадени посериозни можности за погодок.
Шпанија имаше два удари во рамките на голот, но без поголема опасност за аргентинскиот голман Емилијано Мартинез. Пред самиот крај на првиот дел, Марк Кукуреља се обиде со удар кој заврши покрај голот.
И во второто полувреме не се промени многу на теренот. Аргентина продолжи трпеливо да чека грешка на противникот и можност за брз контранапад, додека Шпанците имаа поголем посед на топката и иницијатива, најчесто заканувајќи се со удари од далечина.
Бидејќи во регуларните 90 минути не беше постигнат погодок, победникот мораше да се решава во продолженијата. Во самиот финиш од второто полувреме, Аргентина остана со играч помалку откако Енцо Фернандез заработи втор жолт картон и беше исклучен, што дополнително ја олесни задачата за шпанската селекција.
Бројчаната предност Шпанците ја искористија во 106. минута. Нико Вилијамс испрати одлична асистенција до Феран Торес, кој рутински ја затресе мрежата на Аргентина за голема радост на шпанските навивачи.
До крајот на продолженијата Аргентина не успеа да стигне до израмнување, па по последниот свиреж започна големото славје на фудбалерите на Шпанија и нивните навивачи.
За Шпанија ова е втора светска титула во историјата. Првата ја освоија во 2010 година во Јужна Африка, кога по продолженија со 1:0 ја совладаа Холандија, а херој тогаш беше Андрес Иниеста. Шеснаесет години подоцна, „црвената фурија“ повторно се искачи на светскиот трон, овојпат благодарение на голот на Феран Торес во финалето против Аргентина.
