Управата за јавни приходи најави засилени контроли на евидентирањето на готовинскиот промет во сите угостителски објекти во пресрет на новогодишните празници. Пред започнување со санкции, УЈП спроведе 3.500 советодавни посети, при што беа утврдени неправилности како нефункционални или погрешно регистрирани фискални апарати, неуплаќање дневен промет и неводење финансиски извештаи.
Анализите на податоците од ГПРС, теренските контроли и ДДВ-пријавите покажале ризични состојби кај дел од обврзниците ниски или идентични дневни промети, несогласувања меѓу фискалните уреди и ДДВ-пријавите и разлика меѓу капацитет и пријавен промет. До крајот на ноември УЈП спроведе околу 4.000 контроли, при што изречени се над 2.500 глоби, а 113 објекти се запечатени.
УЈП апелира граѓаните да бараат фискални сметки и порача дека евидентирањето на прометот е законска обврска, а прекршувањата придонесуваат за сива економија и штета за буџетот.
