Христијан Мицкоски секојдневно потврдува дека е само обичен заложник на Левица и Димитар Апасиев па и оттаму потребата постојано да глуми радикал, реагираат од владејачката СДСМ на денешната изјава на лидерот на ВМРО-ДПМНЕ, Христијан Мицкоски за уставните измени.
„Единствениот план на Мицкоски е да го следи Апасиев и со него да се натпреварува со блокади и деструкции со цел да го попречи европскиот пат на државата. ВМРО-ДПМНЕ предводена од Мицкоски не поддржа ниту една одлука, не учествуваше во ниту еден процес важен за евроинтеграциите и за меѓунардоното потврдување на државата. Но затоа, истото тоа ВМРО-ДПМНЕ правеше и прави сè да ја загрози европската иднина, да пласира лажни вести со кои ќе ја манипулира и вознемирува јавноста“, се посочува во ракцијата од СДСМ.
Според нив, така се правело и за време на пандемијата со корона и за време на Европскиот предлог и за време на енергетската криза, „така прават и сега кога треба да се носат реформи со кои ќе се интензивира евроинтегративниот процес“.
„Без разлика на дејствувањето Мицкоски, СДСМ нема да се откаже од европската иднина. Силно и одлучно ќе продолжиме по европскиот пат, а Мицкоски и Апасиев ги чекаат нови порази“, потенцират од СДСМ.
