САД планираат да испратат трета ударна група со носач на авиони на Блискиот Исток поради зголемените тензии во регионот, објавија медиуми повикувајќи се на американски претставници.
Весникот „Волстрит журнал“ и политичкиот портал „Аксиос“ објавија дека до крајот на идниот месец носачот на авиони „Теодор Рузвелт“ ќе им се придружи на „Џорџ Х. В. Буш“ и „Џорџ Вашингтон“ во регионот.
„Рузвелт“ во неделата го напуштил матичното пристаниште во Сан Диего , а бродови од амфибиската група за брзо распоредување „Мекин Ајленд“ исто така биле распоредени во понеделникот, објави „Волстрит журнал“.
Заедно, бродовите можат да превезуваат повеќе од девет илјади војници.
„Аксиос“, повикувајќи се на неименуван американски претставник, објави дека сè уште не е одлучено дали „Рузвелт“ ќе замени еден од носачите што веќе се на Блискиот Исток или ќе претставува дополнително распоредување.
Доколку сите три носачи останат во регионот, американското воено присуство на Блискиот Исток ќе го достигне највисокото ниво од април, објави „Волстрит журнал“.
Потегот следува откако американскиот претседател, Доналд Трамп, во интервју за списанието „Тајм“ изјави дека по ноемвриските избори за Конгресот се „можни“ зголемени воени напади врз Иран.
САД и Израел ја започнаа војната против Иран кон крајот на февруари, изведувајќи опсежни воздушни напади низ земјата.
Конфликтот и натаму останува нерешен, а преговорите се во застој со месеци. Клучна точка на несогласување е контролата врз Ормуска Теснина, важна рута за глобалните енергетски испораки.
