Денеска беше потпишано продолжување на договорот за партнерство меѓу Владата на Северна Македонија и УНОПС за чистење на малата депонија контаминирана со линдан на поранешната фабрика ОХИС во Скопје. Со новиот договор се обезбедуваат дополнителни 12 милиони евра и се предвидува имплементација во следните три години за целосна ремедијација на локацијата. Континуираната интервенција ќе овозможи безбедно отстранување и управување со опасниот отпад, согласно меѓународните еколошки стандарди, со што се намалуваат ризиците за здравјето и животната средина.
„Продолжувањето на договорот ја одразува силата на нашето партнерство и заедничката решителност конечно да се затвори ова долгогодишно еколошко прашање,“ изјави Игор Јанушев, генерален секретар на Владата.
Ремедијацијата започна во 2021 година, при што досега се ископани и спалени 1.969 тони HCH отпад и 586 тони контаминирана почва, што е околу 60% од планираното чистење. Досегашните активности беа финансирани од Владата, Европската Унија и Кралството Норвешка.
„Комплексното наследено загадување не може да се реши од една институција поединечно,“ изјави Микела Телатин, директорка на УНОПС за Југоисточна Европа. „Овој проект покажува како партнерството, довербата и јасно дефинираните улоги можат да донесат конкретни еколошки и здравствени придобивки за заедниците, истовремено обезбедувајќи ремедијацијата да се спроведува безбедно и одговорно.“
Продолжувањето на договорот ја потврдува посветеноста на партнерите за справување со индустриското загадување и отвора пат за идни ремедијациски активности на поголемата депонија на локацијата ОХИС.
