Денеска се одржа редовната седница на Управниот одбор на Заедницата на единиците на локалната самоуправа на Република Македонија – ЗЕЛС, на која беа разгледани повеќе актуелни прашања од значење за функционирањето на општините и унапредувањето на локалната самоуправа.
На седницата членовите на Управниот одбор разговараа за предизвиците со кои се соочуваат единиците на локалната самоуправа, како и за можностите за нивно надминување преку конкретни решенија и унапредување на соработката со релевантните институции.
Меѓу поважните точки на дневниот ред беше разгледано барањето на Стопанската комора во однос на измените на Законот за комуналните такси, при што беа разменети мислења за прашањата кои се од значење за општините и локалната економија.
Управниот одбор го разгледа и текстот на Меморандумот за соработка со Министерството за социјална политика, демографија и млади и Националниот младински совет, со цел унапредување на соработката и заедничко дејствување во области значајни за локалните заедници, младите и нивното активно учество во општеството.
На седницата се разговараше и за подготовките за одржување на Генералното собрание на ЗЕЛС, кое е предвидено да се одржи во средината на декември. Генералното собрание претставува значаен простор за заедничко разгледување на состојбите во локалната самоуправа и утврдување на идните приоритети и активности на ЗЕЛС.
ЗЕЛС и понатаму останува посветен на својата улога како заеднички глас на општините и партнер во процесите насочени кон зајакнување на локалната самоуправа. Преку дијалог, соработка и координација со институциите, ЗЕЛС работи на создавање услови за поефикасни и функционални општини и поквалитетни услуги за граѓаните.
ЗЕЛС продолжува со посветена работа во интерес на локалните заедници и граѓаните, со фокус на конкретни решенија и унапредување на услугите на локално ниво.
