Синоќа заврши групната фаза на Мундијалот во Катар, се уште се формираат впечатоците, беше доста изненадувачки, а осминафиналето почнува веќе денеска со дуелите Холандија – САД (16 часот) и Аргентина – Австралија (20 часот).
Освен што беа елиминирани неколку фаворити како Германија и Белгија и што Србија остави многу лош впечаток и се врати дома со само еден бод, многу интересен е фактот што никој не се пласираше во осминафиналето со сите три победи, што е првпат по Светското првенство во 1994 година во Соединетите Американски Држави.
Тоа Светско првенство го освои Бразил.
Последни кои имаа шанса да одат во нокаут фазата со максимални девет бода беа Португалија и Бразил, но првите беа поразени од Јужна Кореја со 2:1, а „кариоките“ загубија од Камерун со 1:0.
Кога ќе се повлече линијата, најуспешни селекции во групната фаза беа оние кои освоија по седум бода, а тоа се Англија, Холандија и Мароко.
Победници на групата со по шест бода беа Аргентина, Франција, Јапонија, Бразил и Португалија.
