Аргентина и Австралија ќе се сретнат вечерва во осминафиналето на СП 2022, а големата ѕвезда на „гаучосите“ и на светскиот фудбал, Лео Меси, ќе ја предводи селекцијата на својот официјален натпревар – број 1000. Оваа импресивна бројка е постигната со екипите на Барселона и на ПСЖ и националниот тим на Аргентина.
Единствениот Аргентинец кој може да се пофали со вакво достигнување е Хавиер Занети, кој има 1.114 натпревари во кариерата.
Аргентинците се меѓу големите фаворити за титулата во Катар. „Албиселесте“ не станале шампиони од 1986 година и сите чекаат Лео Меси да го одведе тимот до првото место на СП во Катар.
Тимот на Скалони започна со шокантен пораз од Саудиска Арабија со 1:2 на почетокот на Светското првенство, но не дозволи изненадување во следните два натпревари од групната фаза и го освои првото место во групата Ц.
Австралија е меѓу пријатните изненадувања на овој Мундијал.
Победникот од ова осминафинале во следната фаза ќе се соочи со подобриот од првиот осминафинален дуел меѓу Холандија и САД.
