Фудбалската репрезентација на Македонија вечерва ја пречекува Малта во првиот квалификациски натпревар од новиот циклус за ЕВРО 2024 во Германија. Искусниот напаѓач Илија Несторовски повторно е во националниот тим откако ја надмина повредата на коленото поради која пропушти голем дел од минатата сезона.
Тој вели дека Македонија мора да се „ресетира“ и да заборави на успесите од минатото, а да се фокусира на претстојниот квалификациски циклус.
„Треба се што се случуваше во минатото, тоа е Европското првенство, баражот со Италија, потоа и мечот со Португалија, да го заборавиме, затоа што ни стартуваат нови квалификации. Мора да бидеме макисмално концентрирани, знаеме дека играме против Малта и не смееме да ја потцениме. Мора да бидеме максимално ангажирани од првата минута, да дојдеме до три бода, а понатаму да се стремиме кон повисок пласман затоа што знаеме дека имаме добра репрезентација. Нашата цел мора да е што повисок пласман, можеме да играме против секого, но само доколку бидеме на нашето најдобро ниво“, вели Несторовски.
Надежите се дека ќе оствариме победа над Малта.
„Сѐ освен три бода со Малта за нас ќе биде лош резултат, ние сме поквалитетни, не смееме да криеме дека сме фаворити, ама мора да го респектираме ривалот. А, кога ќе почне натпреварот, мора лавовски да се бориме за Македонија и за трите бода“, изјави Несторовски.
Натпреварот меѓу Македонија и Малта се игра вечерва на арената „Тодор Проески“ во Скопје од 20:45 часот.
