Во два одвоени случаи, на пристаништата во Игуменица и Пиреа, Крајбрежната служба на Грција открила и запленила кокаин, канабис и метамфетамин со вкупна вредност што се проценува на над четири милиони евра, а биле уапсени три лица, од кои двајца вработени на едно од пристаништата, јави дописничката на МИА од Атина.
Во првиот случај, на пристаништето во Игуменица, со помош на куче-душкач била извршена проверка на камион што пристигнал од Италија и биле откриени 34 кутии со 292 херметички затворени пластични кеси со суров канабис со вкупна бруто-тежина од 317 килограми, 14 пластични пакувања со 16,8 килограми кокаин, две кеси со 25 килограми кристален метамфетамин и четири пластични садови со по 20 литри ацетон што се користи за растворање наркотици.
Возачот бил уапсен, а според крајбрежната служба на Грција, вредноста на одземената дрога се проценува дека надминува три милиони евра.
Вториот случај е на најголемото грчко пристаниште Пиреа во Атина, каде што биле откриени 26 килограми и 492 грама кокаин што пристигнал од Еквадор во контејнер со банани, додека пак уапсени се две лица, според грчките медиуми, вработени на пристаништето кои украле дел од конфискуваната дрога.
Од крајбрежната служба на Грција соопштија дека двајцата уапсени се членови на криминална организација со меѓународен карактер, кои олеснувале увоз и трговија на кокаин со потекло од Јужна Америка, преку конкретното пристаниште, а ги искористиле нивните позиции и пристапот до контејнерот за да ја пренесуваат дрогата.
Вредноста на запленетиот кокаин е околу еден милион евра.
