На иницијатива на Словенечката и на Македонската асоцијација на кинематограферите, од 18 до 20 јануари во Кинотеката на Словенија во Љубљана, се одржува третото издание на фестивалот „БалКам“ (Балканска камера“), на кој се прикажуваат филмови од поранешните југословенски републики со акцент на кинематограферската работа и кинематограферите како автори.
На фестивалот свое учество зедоа и Македонската асоцијација на кинематограферите – МАК при Друштвото на филмските работници на Македонија (ДФРМ), најстарото релевантно стручно здружение од областа на филмското производство и другите аудиовизуелни медиуми, чии цели се остварување и заштита на правата и интересите на македонските филмски професионалци, кои дејствуваат на територијата на Македонија и во странство, како и обезбедување континуиран развој на филмската дејност, стимулирање и унапредување на филмската професија, промоција на филмската уметност и култура во нашата земја.
Македонската асоцијација на кинематограферите оваа година ќе учествува со филмови што се снимени во Македонија од македонски кинематографери и поддржани од Агенцијата за филм на РС Македонија.
Проекциите на МАК почнуваат на 19 јануари (15 часот) со краткометражниот игран филм „Северен Пол“ од кинематограферот Владимир Самоиловски. Следниот ден, 20 јануари (19 часот), ќе бидат прикажани долгометражниот игран филм „Мими“ на кинематограферот Дејан Димески и студентскиот краток игран филм „Прогестерор“ на кинематограферот Димитар Атанасоски од ФДУ – Скопје, чија проекција е закажана за 15 часот. Последниот филм со кој ќе се претстави Македонската асоцијација на кинематограферите е „Тетовирање“, на кинематограферот Мишо Самоловски, а ќе биде прикажан на 22 јануари (недела), со почеток во 15 часот, во рамките на програмата „Филмска легенда“.
