Француските служби заплениле 68 килограми кокаин во товарно моторно возило управувано од 44-годишниот македонски државјанин М.Ф., соопшти Министерството за внатрешни работи. Дрогата била пронајдена на наплатната станица Фонтен, а акцијата била спроведена по оперативни информации доставени од македонската полиција.
Според МВР, информациите ги обезбедиле Одделот за криминалистичка полиција и Единицата за недозволена трговија со дрога. Преку Секторот за меѓународна полициска соработка и Европол, тие биле проследени до надлежните француски органи, по што следувала заплената.
Од Министерството нагласуваат дека навремената размена на оперативните сознанија и координацијата со странските полициски служби биле клучни за реализацијата на акцијата.
Ова, според МВР, е втора успешна меѓународна акција во период од еден месец во која придонела македонската полиција. Претходно, соработката со грчката полиција резултирала со заплена на 324 килограми марихуана.
„Овие резултати ја потврдуваат ефикасноста на меѓународната полициска соработка и континуираната посветеност на МВР во борбата против организираниот криминал и недозволената трговија со дрога“, наведуваат од Министерството.
Во соопштението не се наведуваат дополнителни информации за постапката против возачот, ниту за потеклото и крајната дестинација на запленетиот кокаин.
