Лук Шо, по неговата добра партија за Англија на драматичното 3:3 реми со Германија, застана во одбрана на својот соиграч од репрезентацијата, Хери Мегваер, и од Манчестер јунајтед велејќи дека не видел некој фудбалер да е повеќе критикуван од капитенот на „ѓаволите“.
Шо го постигна првиот гол за Англија и покажа дека е подготвен да се бори со Тајрел Маласија за стартното место на „Олд Трафорд“, но Мегваер не беше толку импресивен – тој беше виновен за пеналот по несмасниот фаул над Џамал Мусијала за првиот гол на Германците, а потоа неколкупати клучно ја губеше топката на својата половина. Шо признава дека Мегваер поминува низ тежок период.
„Ќе бидам искрен, во моментот се работи за тежок момент. Секако, Хери е фантастичен фудбалер со огромен карактер. Издржа многу критики, најмногу што сум видел во фудбалот, но никогаш не се крие, секогаш е тука. Тој е доволно храбар да излезе на теренот и да ги покаже силата и карактерот бидејќи сите што го познаваат знаат каков фудбалер е. Во моментот целиот свет е против него, но сите го поддржуваме. Луѓето треба да сфатат каква улога има во англиската репрезентација“, вели Шо.